Eskuminak: Memoriaren baitan

Film labur hau hainbat fasetan banatzen da: aurreprodukzioa, grabaketa, postprodukzioa eta hedapena.

• Aurreprodukzioa: Gidoia idazten hasi genuen fase hau. Castinga egin eta proiektua aurrera eramateko beharrezko baimen guztiak lortu genituen. Fase honen azken zatian kokalekuak bisitatu eta proba tekniko guztiak egin genituen.
• Grabaketa: Fase hau irailaren 27an hasi eta 27ean amaitu zen.
• Postprodukzioa: Zati honetan gaude orain. Film laburraren edizioari eta making of-ari erreparatuko diegu gehien bat.
• Hedapena.: Proiektuaren azken fasean, egindako lana sare sozial eta elkarteetan partekatu eta jaialdietara aurkeztuko dugu..

Finantziaketa grabaketan izan ditugun gastuak errekuperatzeko (dietak, garraioa eta atrezzoa) eta film laburra zabaltzeko (festibaletara, adibidez) izango da.

Eskuminak benetako gertaeretan oinarritutako film laburra da. Hain zuzen ere, Nerearen aitonaren istorioa kontatzen du. Istorioaren ikuspuntua da film laburra hain berezia egiten duena, izan ere, kontakizunean barna gidatzen gaituena Alzheimerra duen pertsona bera da.

Film labur osoa euskaraz egingo da (azpitituluekin, euskal hiztunak ez direnentzat ere eskuragarri izan dadin), sortzaile gisa, euskarazko kultura sortu ahal izateak asko pozten baikaitu. Gainera, grabazio guztiak Donostian egingo dira, eta, horrela, historiari egiazkotasuna emango zaio (oinarri duen familia bertan bizi baitzen).

Proiektu honen bitartez, familia askoren errealitatea erakutsi nahi dugu laguntza emanez eta herritarrak gaixotasun neurodegeneratibo horren inguruan kontzientziatzen saiatuz. Bestalde, lankidetzan dihardugu bertako Alzheimer elkarte batekin, gizarte-konpromisoa atalean deskribatzen den moduan.

Eskuminak memoriaren baitan egindako bidaia bat da, Alzheimerra pairatzen duten pertsona, eta familia, guztiei zuzendutakoa.

Zaila da gure aiton-amonei agur esatea, eta nire ustez gero eta zailagoa da endekapenezko gaixotasunak dituztenean; Alzheimerrari buruz hitz egiten ari naiz zehazki. Gogorra izan zen prozesua; nire aitonari ibiltzea, idaztea, jatea, edatea eta komunera bere kabuz joatea ahaztu zitzaion. Nire aitona ume bihurtu zen. Kanpoan ikasten ari nintzenean nire beldur handiena zera zen, ni itzuli eta aitona nitaz ez gogoratzea.

Nola esan agur ezagutzen ez zaituen pertsona berezi bati? Aitona bizitzan behin ikusi dut negarrez, hori izan zen bera ikusi nuen azkeneko eguna, ez nintzen “agur” esateko gai izan. Horrek aho-keru mingaitza utzi zidan eta berari film-labur bat dedikatzea agur esateko modu polita izango litzatekela bururatu zitzaidan.

“Eskuminak” film laburrak nire aitonaren, Agustín Barciaren, istorioa kontatzen du. Prozesua gogorra izan da nire familiarentzat, baina nola bizi zuen gaixotasuna nire aitonak? Galdera horri erantzuten dio film labur honek, hain zuzen ere.

Espainiako Estatuan, urtero 40.000 kasu berri diagnostikatzen dira, hau da, 2018. urtean, nire aitona diagnostikatu zuten urtean, beste 39.999 familia zeuden gure egoera berean. Honekin esan nahi dudana zera da, azken finean film laburrak mundu osoan zehar oso ezaguna den gai bati heltzen diola.

Nerea Fajarnés Barcia (Zuzendari eta gidoilaria)

Ikus-entzunezko Komunikazioa ikasten dugun ikasle talde bat gara, istorioak kontatzeko eta mundua ikusteko dugun modua partekatzeko grina dugunak. Pertsonalki, proiektu hau ikasten eta hazten jarraitzeko aukera bat da. Ikasle garenez, film labur honek proiektu bat modu profesionalean sortzeko eta esperimentatzeko aukera ematen digu.

Gutako askok bizi izan dugu, edo ezagutu dugu, film laburraren oinarri den egoera antzekoren bat. Horregatik, proiektu honekin babestuta sentitzen gara, eta, aldi berean, egoera horretan dauden milaka familia horiei bakarrik ez daudela jakinarazteko aukera gisa erabili nahi dugu. Hori guztia bizitza batek ematen duen gauzarik politenaren bidez egin dugu, baita bizitza itzaltzen denean ere gelditzen denarekin: oroitzapenekin.

• Nerea Fajarnés Barcia da Eskuminak filmaren gidoilari eta zuzendaria. Txikitatik izan du argazkiak eta bideoak grabatzeko eta editatzeko zaletasuna. 2011n bere bideoak (batez ere bideo musikalak) eta fotomuntaketak sare sozialetan argitaratzen hasi zen. Bere hobbyak Ikus-entzunezko Komunikazioko ikasketak hastera eraman zuen Mondragon Unibertsitatean, eta seihileko akademiko batean Eskandinaviako Fikzio Garaikidea eta Bideo Ekoizpena ikasi ditu Norvegiako Høgskolen i Innlandet Unibertsitatean. Video Star aplikaziorako ikus-entzunezko edukiak garatzen eta sortzen dihardu Frontier Designekin, "MU Telebista" n bekaduna izan zen eta bi hilabetez egin zituen praktikak Arteman Komunikazioan. 2016ko Francisco Javier de Landaburu Civis Saria jaso zuen herritarrak klima-aldaketaz kontzientziatzeko egin zuen ikus-entzunezko lan batengatik, 2019ko Huhezinema eta 2018ko Euspot ikus-entzunezko lehiaketetan finalista izan zen, berak egindako film labur bat eman zuten Goiena telebista katean eta Nagaokan (Japonia) euskal kulturari buruz egindako bideo bat aukeratu zuten. SOS Arrazakeriarekin boluntariotzan ere aritu da eta Gure Esku Dago proiektuari argazkiak atera dizkio Gasteizen.

• Nagore Rodriguez Corral Eskuminak film laburreko argazki zuzendaria da. Ikus-entzunezko Komunikazioa Gradua ari da ikasten Mondragon Unibertsitatean. Urte hauetan zehar ikus-entzunezko ezagutza garatu du Fagor Ederlan eta Arteman enpresetan praktikak eginez. Argazkilari gisa ere lan txikiak egin ditu, besteak beste, Galiziako orkestrentzako eta "Nhil" musika taldearentzako. Wood Strings musika taldearentzat bideoklipa egin zuen, eta bertan argazki zuzendaria izan zen. Gure Esku Dagoren proiektuan argazkilari boluntarioa izan da eta ArtGazkiko #etxeangelditu lehiaketako argazki onenaren 2. saria jaso du.

• Maite Garmendia Gallastegi Film laburraren muntaketaz arduratu da. Argazkilaritza ikasi zuen Gasteizko EASDn, eta gaur egun, Ikus-entzunezko Komunikazioa ari da ikasten Mondragon Unibertsitatean. Horrez gain, Komunikazio eta Administrazio ikasketak egin ditu seihileko akademiko batean Artevelde University of Applied Sciences Unibertsitatean (Belgika). Gaztea Irratian bekadun gisa laritu da community manager eta transformadore digital gisa. Santiago Yaniz Aramendia argazkilariarekin ere egin ditu argazkiak. Ajuria eta Urigoitiaren argazki eta ikus-entzunezko erakusketa egin du. 2018an berak, Idoia Lahidalgak, eta Oihane Puertasek, euskal gastronomiari buruz egindako bideo bat aukeratu zuten Nagaoka Cityn (Japonia) emititzeko; proiektuaren helburua bi herrialdeak senidetzea izan zen, eta bideo horrek eman zion hasiera ekitaldiari.

• Nekane Jubera Sáenz-López Eskuminak film laburraren zuzeneko soinuaz eta soinu diseinuaz arduratu da. Mondragon Unibertsitatean ari da Ikus-entzunezko Komunikazioa ikasten. "Kanpora!" Dokumentala zuzendu zuen, eta bertan ere soinuaz arduratu zen. Wood Strings taldearen bideoklipean egin du lan Nagore Rodriguezekin batera. Berak egindako dokumentaletako bat Goiena telebista katean eman zen. Fagor Ederlan enpresan ikus-entzunezko edukiak garatzen aritu da lanean. Horrez gain, ikus-entzunezko ezagutza garatu du EiTB katean, izan ere, bertako kirol laguntzailea izan da, bertako erredakzioan, estudioan eta unitate mugikorretan. Gaur egun, batez ere enpresentzat egiten du lan, horientzako ikus-entzunezko eduki pribatuak garatuz.

• Oihane Puertas Ramírez Film laburraren zuzeneko soinuaz arduratu da. Ikus-entzunezko Komunikazioa ari da ikasten Mondragon Unibertsitatean, eta Komunikazioa eta Hedabide Digitalak ikasi ditu seihileko akademiko batean Tecnológico de Monterrey Unibertsitatean (Mexiko). Bertan, sustenta Eco Lorategia enpresarentzat publizitate kanpaina bat eta Silvana Zanella Pasticceria enpresarentzat bideo korporatibo bat egin ditu. 2017an generoari eta kirolari buruzko artikulu bat argitaratu zuen Líderas aldizkarian. 2018an berak, Idoia Lahidalgak eta Maite Garmendiak euskal gastronomiari buruz egindako bideo bat aukeratu zuten Nagaoka Cityn (Japonia) emititzeko; proiektuaren helburua bi herrialdeak senidetzea izan zen, eta bideo horrek eman zion hasiera ekitaldiari. Komunikazio bekaduna izan da Mondragon Unibertsitatean eta praktikak egin ditu EiTBn eta Berria egunkarian. Aurten, Idoia Lahidalgarekin batera, spot onenaren saria eta Mondragon Unibertsitateko spot onenaren saria irabazi ditu Euspot ikus-entzunezko lehiaketan, "Zuk zuretzat sortu" lanarekin. Gainera, Gaztezuloren ikus-entzunezko lehiaketan publikoaren saria irabazi dute "errealitatetik ihesi" lanarekin.

• Maite Carriet Nuñez Eskuminak film laburraren ekoizlea da. Ikus-entzunezko Komunikazio graduko ikaslea da Mondragon Unibertsitatean, eta seihileko akademiko bat egin zuen Artevelde University of Applied Sciences unibertsitatean, Komunikazio eta Administrazio ikasketetan. Bertan, Ghent hiriko udalak, turismoa sustatzeko egindako ikus-entzunezko lanarengatik saritu zuen, Maite Garmendiarekin batera. Europako Parlamentuko gazteentzako debatean parte hartu zuen, Committee on Industry, Research and Energy-aren baitan, Europar Batasunaren barruan komunikazio digitala hobetzearen alde. Hiru urtez jarraian, Kenpoko Euskal Selekzioaren argazkilari ofiziala izan da, batez ere txapelketak dokumentatzen. Goienan (tokiko hedabidea) eta Gaztean (EiTB taldeko irratia) bekadun gisa lan egin du edukien ekoizpenean eta lokuzioan. Gainera, Fondo Formación Fundazioan zein El Hogar Fundazioan boluntarioa izan da, eta komunikazioan lagundu du hauetan.

• Idoia Lahidalga Baglietto Film laburraren soinu bandaren ekoizlea eta konpositorea da. Mondragon Unibertsitatean ari da ikasten Ikus-entzunezko Komunikazioa, eta seihileko akademiko batean Kazetaritza, Harreman Publikoak eta Ikus-entzunezko Komunikazioa ikasi ditu La Universitat Central de Catalunya en Vic-en. Txikitatik egon da musikaren munduan, eta musikal batean parte hartu du. Bere ikerketek eta teknikek Eskuminak taldearen soinu bandaren sortzailea izateko aukera eman diote. 2018an berak, Oihane Puertasek eta Maite Garmendiak euskal gastronomiari buruz egindako bideo bat aukeratu zuten Nagaoka Cityn (Japonia) emititzeko; proiektuaren helburua bi herrialdeak senidetzea izan zen, eta bideo horrek eman zion hasiera ekitaldiari. Ekaitz Zilarmendirekin batera lan egin du huntza taldearentzako argazki-saioan (2020), eta dantzan.eus webgunerako bideoak eta argazkiak egiten ditu. Aurten, Oihane Puertasekin batera, spot onenaren saria eta Mondragon Unibertsitateko spot onenaren saria irabazi ditu Euspot ikus-entzunezko lehiaketan, "Zuk zuretzat sortu" lanarekin. Gainera, Gaztezuloren ikus-entzunezko lehiaketan publikoaren saria irabazi dute "errealitatetik ihesi" lanarekin.

Ezagutu gure taldea: