Grazas e mil grazas, amigas mecenas!
Cando aínda nos estabamos a afacer ao súor da máscara na cara, ao olor a xel hidroalcólico nas mans e a que un cóctel de temor e incerteza roldara a cotío as nosas cacholas, démoslle marxe á ilusión e unha oportunidade á alegría e celebramos a segunda edición do Delas Fest.
Unha rede enorme de apoios, na que se entrelazaron as enerxías particulares e colectivas cos soportes institucionais e privados, permitiron, permististes, que puideramos celebrar o festival malia afrontar unhas condicións que, dificilmente, podían ser máis complexas para a participación na cultura e para a arte no espazo público.
Hoxe, coa vontade de continuar a levar ás rúas do noso país propostas artísticas con vontade transformadora, comezamos unha nova conta atrás. Imos por máis!