RATIÑA

PUNTOS FORTES

Temática relevante e actual
Ratiña aborda o acoso escolar, un tema cada vez máis recoñecido pola súa importancia social, e contribúe á súa visibilización no ámbito cultural, algo esencial para fomentar o cambio.

Contido pouco representado en Galicia
O audiovisual galego precisa diversificarse para diferentes públicos. Ratiña destaca ao centrarse na infancia, un eido aínda pouco explorado na nosa contorna.

Proposta artística innovadora
O deseño de arte mestura diversas disciplinas e conta cunha achega cultural significativa mediante a obra pictórica de artistas galegas. A participación da recoñecida Rosa Úbeda engade un valor de produción diferencial.

Aposta polo novo talento
O equipo técnico está composto por novas creadoras xa recoñecidas polos seus traballos anteriores. Ademais, Ratiña marca o debut dunha prometedora cineasta galega cunha carreira chea de proxectos viables.

Historia real e persoal
Baseada en vivencias propias, a curta asegura honestidade e rigor, engadindo interese pola súa autenticidade.

Participación de Luis Zahera
A implicación dun actor recoñecido como Luis Zahera fortalece tanto a calidade interpretativa como as posibilidades de promoción e distribución, aportando prestixio ao proxecto.

Equipo comprometido
A temática e a proposta creativa foron recibidas con entusiasmo polo equipo, o que se reflicte no agarimo e na profesionalidade investidos no proxecto.

OBXECTIVOS

Con Ratiña, preténdese cubrir unha necesidade no audiovisual galego: ofrecer contidos en galego sobre a infancia, un tema escasamente representado. Esta historia aborda cuestións fundamentais como o bullying e a xestión emocional cos pais, creando unha narrativa que busca conectar con nenos e adultos por igual.

Inspirada por experiencias persoais, a curta pretende ser unha ferramenta para proxectar en colexios e institutos, xerando debates sobre o acoso escolar e as súas consecuencias máis alá do ámbito educativo. Tamén se dirixe a un público adulto, especialmente a pais e nais, ofrecendo unha perspectiva externa sobre a importancia da comunicación emocional e o papel das figuras de referencia na vida dos nenos.

O obxectivo final é crear aquilo que nos faltou no pasado: historias en galego que non só entreteñan, senón que tamén acompañen e axuden a comprender emocións complexas. Ratiña aspira a ser unha contribución relevante no ámbito educativo e cultural, sen esquecer a súa intención de resonar nos circuítos do cine social e de autor.

MOTIVACIÓNS XERAIS DA MIÑA TRAXECTORIA

A miña motivación para crear cine nace do desexo de retratar con honestidade aquelas vivencias persoais que non están suficientemente representadas no audiovisual galego, ou que, cando se representan, adoitan facelo a través de estereotipos ou miradas superficiais. Quixera explorar temas como a familia non normativa, a adicción dentro dun contexto cultural e económico medio-alto, os sistemas de apego infantil e relacional, as relacións tóxicas, a deconstrución da masculinidade, e a xestión emocional en relación ás xeracións que conviven entre elas, moitas veces con patróns culturais opostos.

O cinema que imaxino navega entre a temática social, pero alonxándose dos tópicos habituais para achegarse a un estilo máis intimista e subxectivo. Creo que esta perspectiva é a característica máis distintiva do que escribo.

No caso de CHORIMA, considero que aínda non existe unha representación real de relacións pouco convencionais e da saúde mental vista dende o prisma do apego familiar, sen caer na romantización do amor tóxico, buscando en cambio a súa explicación psicolóxica e as súas orixes nas feridas persoais. En GARABATO, por outro lado, intento mostrar unha realidade sobre a ausencia das figuras paternas e o alcoholismo dende un enfoque cotián e terno, sen perder de vista a complexidade e contradición das vivencias da infancia. Quixera transmitir a idea de que é posible romper con certos patróns familiares e que estes non nos condenan a un destino fixo, mostrando tamén a realidade de moitos fogares onde os nenos se senten sós, co fin de ofrecer unha reflexión que permita mellorar os coidados e a atención ás persoas da nosa contorna.

PÚBLICO

Ratiña é unha curtametraxe para todos os públicos que busca atraer a aqueles interesados nun cine social, costumista e de autor. Con un carácter minimalista, mesturado con pinceladas poéticas, a súa perspectiva está ancorada na realidade inexorable, procurando encontrar verdades profundas e denunciar certas construcións sociais.

Definindo o público máis específico, pensamos que o público principal serán mulleres de 25-34 anos (adultas A) e 35-44 anos (adultas B), tanto de cidades como de núcleos rurais, aínda que predominantemente urbanitas de alto nivel sociocultural e educativo. Este perfil, denominado INDIE MOVIE SELECTIVES, é habitual no cinema de autor. Gustan do drama e das historias con personaxes femininos non arquetípicos como protagonistas, sendo moi selectivas nas súas eleccións cinematográficas. Este grupo ten un grande interese polo cinema europeo e mundial, e son cinéfilas fieis. A pesar de que para unha curtametraxe o espectro de público pode ser máis amplo e heteroxéneo, este perfil representa unha boa parte da audiencia potencial.

Alicia Úbeda. Guion, dirección, dirección de arte e vestiario

Graduada en Comunicación Audiovisual pola Universidade Complutense de Madrid, con título honorífico na súa promoción, e diplomada no Máster en Produción Executiva da Universidade da Coruña. Traballou como editora e guionista na produtora rusa Vimotion e como profesora de guion e dirección na escola audiovisual 35mm. Ten experiencia nos departamentos de dirección e produción de varias rodaxes, e editou os documentais Sueño e Memoria de un baile. Actualmente, prepara o seu primeiro proxecto como directora, Ratiña.

Bea Villar. Directora de produción

Diplomada no Mestrado en Produción Executiva da Voz (MPXA), traballa con Cristela Torres na produtora Brava desde 2023. Participou como directora de produción en proxectos como Os espazos en branco (Bruno Arias, 2022), O coidado (Miguel Canalejo, 2022), e Pringadas (Belén Puime, 2022). Tamén foi xefa de produción en Only on Earth (2022) e Prefiro condenarme (Margarita Ledo). Conta con ampla experiencia en organización e produción de festivais como Curtocircuito ou Intersección.

Cristela Torres. Produción Executiva

Graduada en Comunicación Audiovisual pola Universidade de Santiago de Compostela, con máster en xornalismo e MBA na USC. Ten formación en produción e xestión de proxectos audiovisuais (ATRESMEDIA, 2021). Produciu Amnesia 3.0 (Irene Pin, 2020-22), primeira serie interactiva en galego, e curtametraxes como Somos Cárcere (Irene Pin, 2021) ou III Marías (Andrea Bouzo, 2021). Actualmente, é a produtora executiva de A previa (Belén Puime, 2022) para CRTVG e prepara novos formatos para AGalega.

Alberto Díaz. Produción Executiva

Licenciado en Comunicación Audiovisual pola Universidade Rey Juan Carlos, con máster europeo en Estudos sobre Cinema. Gozou dunha bolsa de arte contemporánea na Real Academia de España en Roma, e obtivo unha das bolsas talento da AGADIC polo proxecto Exhalación. É fundador da produtora Mordisco Films e da distribuidora de curtametraxes Yaq Distribución. Como produtor, leva máis de 2120 seleccións e 390 premios en festivais internacionais, e é produtor de longametraxes como Dous Amigos e A dente de can (estreado no festival de Sevilla).

Sabel Brand. Axudante de dirección

Carmen Chamadoira. Script

Andrea Louzao. Dirección de fotogrfía

Ramón Martínez. Axudante cámara

Paula Varela. Gaffer

María Selgas. Atrezzista

Aroa Ferreiro. Xefatura de son

Inés Sánchez. Maquillaxe

Mario Horro. Coach infantil

Laura Piñeiro. Montadora

Cor, posprodución de son, VFX por determinar.

ELENCO:

Luis Zahera. Jose (pai)
(En participación desinteresada co obxectivo de apoiar as novas voces femeninas do cinema galego)

Sara Ferro. María (parella do pai)

Carmen García. Velia (filla)